اسلام آباد ۔ 31جولائی (اے پی پی) الیکشن کمیشن کجھ سیاسی جماعتاں ولوں الیکشن کمیشن دے مستعفی تھیونڑ دے مطالبے کوں مسترد کریندے ہوئیں آکھیے جو بغیر ثبوت دے صاف شفاف تے منصفانہ الیکشن دے انعقاد تے اعتراض چاونڑ قطعاً بے بنیاد اتے من گھڑت ہے، پورے ملک توں دھاندلی دی کوئی شکایت کائنی ملی ،عوام دے مینڈیٹ دا احترام نہ کرنڑجمہوریت دے منافی ہے ،کہیں کوں شکایت ہے تاں ایندے ازالے سانگے قانون ڈتا گے تے رستہ اختیار کرنڑاں چاہیدے ، آر ٹی ایس دی ناکامی دے حوالے نال وجوہات دا جائزہ گھن تے ذرائع ابلاغ دے نال شیئر کریسوں ،ہریے ہوئے امیدواراپنڑی شکست کوں تسلیم کرن ،توقع ہے جو ساریاں جمہوری قوتاں تے لوک اپنڑے ذاتی مفادات کوں ہک پاسے رکھیندے ہوئیں آئین تے قانون تے جمہوریت دی بالادستی سانگے آئینی اداریں تے نہ صرف بلاجواز تنقید توں گریز بلکہ ہک مستحکم جمہوری پاکستان سانگے کردار ادا کریسن ۔منگل کوں الیکشن کمیشن اچ پریس کانفرنس نال خطاب کریندے ہوئیں سیکر ٹری الیکشن کمیشن بابر یعقوب آل پارٹیز کانفرنس دے اختتام تے کجھ سیاسی رہنماواں ولوں جاری بیان کیتے بیان جو الیکشن کمیشن کوں مستعفی تھی ونجنڑاں چاہیدے ،تے افسوس دا اظہار کیتا تے ایں مطالبے کوں مسترد کر ڈتا ۔انہاں آکھیا جو صاف شفاف تے غیر جانبدار انتخابات بارے بغیر کہیں ثبوت دے ایں طرح دے بیانات افسوسناک تے حقائق دے منافی ہن ۔ عام انتخابات 2018ءدے دوران عوام آزادانہ ماحول اچ اپنڑے ووٹ دا حق استعمال کیتا تے پورے ملک اچ الیکشن دھاندلی دے حوالے نال حالی تئیں کوئی وی شکایت کائنی ملی ۔ الیکشن کمیشن اے وی واضح کرنڑ چاہندے جو اگر کہیں امیدوار کوں کہیں وی حلقے یا پولنگ سٹیشن دے حوالے نال کوئی شکایت اے تاں ایندے ازالے سانگے قانون اچ ڈتے گے طریقہ کار دے مطابق رستہ اختیار کرن ۔ انہاں آکھیا جو الیکشن نتیجے اچ تاخیر تے سارے صوبائی الیکشن کمشنرز، ڈسٹرکٹ ریٹرننگ افسران اتے ریٹرننگ افسران توں وضاحت منگی گی اے تے آر ٹی ایس دے حوالے نال تفصیلی تجزیہ اتے محاسبہ کیتا ویسی ۔
