اسلام آباد ۔ 13 دسمبر (اے پی پی) صدرمملکت ڈاکٹر عارف علوی آکھیے جو پاکستان فرانس نال معاشی تعاون ودھاونڑ دی خواہش رکھیندے ۔ پاکستان اچ سرمایہ کاری دوست پالیسیاں پاروں سرمایہ کاری دی گنجائش موجود اے ، متنازعہ شہریت (ترمیمی) ایکٹ 2019 دا اعلان بھارتی سیکوالرزم دی بدنامی اے انہاں اقلیت خاص طور تے مسلماناں کوں خطرے اچ پاڈتے ۔ اے گال انہاں جمعے کوں ایوان صدر اچ فرانس دے سفیر مارک بریٹی نال ملاقات اچ آکھی اے ۔ صدر آکھیا جو کشمیر اچ مکمل لاک ڈاﺅن اے جتھاں کشمیری عوام دیاں ساری شہری آزادیاں معطل ہن تے انہاں تے وحشیانہ تشدد تے ،عصمت دری تے قید دی سزاڈتی ویندی پئی اے ۔ کشمیری عوام دی حالت زار دا ذکرکریندے ہوئیں انہاں امید ظاہر کیتی جو فرانس کشمیری عوام دے ڈکھ مکاونڑ اچ اپنڑاں صحیح کردار ادا کریسی تے بھارت تے کشمیر اچ انسانی حقوق دیاں پامالیاں کوں روکنڑ تے زور ڈیسی ۔ صدر آکھیا جو پاکستان فرانس نال اپنڑے تعلقات کوں اہمیت ڈیندے تے ڈو پاسے دے نال نال یورپی یونین دے تناظر اچ فرانس نال اپنڑے تعلقات مزید ودھاونڑ دی کوشش کریندا پئے ۔انہاں ایں اطمینان دا اظہار کیتا جو پارلیمانی دوستی گروپاں سمیت ڈوہیں ملکاںدی قیادت وچال اعلیٰ سطح تے رابطے موجود ہن جنہاں سانجھے تعلقات کوں مضبوط بنڑاونڑ اچ اہم کردار ادا کیتے ۔
